ՀՈՒՇԱՆՎԵՐԱՅԻՆ ՏՈՒՓԵՐԻ ԱՐՏԱԴՐՈՒԹՅՈՒՆ

 

Լինում են դեպքեր, երբ լավ դիզայնի և գեղեցիկ 3D պատկերի առկայության դեպքում անգամ ի վերջո ստացվում է թեև նման, սակայն ոչ լրիվ այն, ինչ ակնկալում էիք: Արտադրողի և պատվիրատուի միջև միմյանց հանդեպ հարցեր և պահանջներ են ծագում գործնականում բոլոր հարցերի վերաբերյալ՝ սկսած գույնի անհամապատասխանությունից, վերջացրած տուփի՝ ապրանքի չափերին անհամապատասխանությամբ: Նման դեպքերից խուսափելու համար առաջարկում ենք հետևել չորս համաձայնությունների սկզբունքին:

 

 

Համաձայնություն No1

Տուփի կառուցվածքի և նյութերի համաձայնեցում

Արտադրողը ստեղծում է տուփի, հաճախորդի ակնկալիքներին համապատասխան, մեկ կամ ավելի կառուցվածք: Նպատակը՝ համոզվելն է, որ տվյալ կառուցվածքի համաձայն ստեղծված տուփը կդիմանա բեռնվածությանը, տուփի մեջ դրված ապրանքը չի խաղա դրա ներսում և տուփը բացելիս միջից չի ընկնի, օգտագործողին հարմար կլինի բացել և փակել այն: Այս փուլում նաև կարևոր է համոզվել, թե որքան հարմար է փաթեթավորել ապրանքը. որքան հեշտ է դնել տուփի մեջ ապրանքը, այնքան ավելի մեծ է արտադրողականությունը :

 

Որոշ դեպքերում այս փուլում նաև քննարկվում են տուփը լրակազմող հնարավոր նյութերը. ծխնիները, կողպեքները, թավշե կամ պլաստմասսայից ներդիրը և այլն: Եթե այս բոլոր պարամետրերով հաճախորդ է գոհ է լինում, ապա երկու կողմերը հաստատում են կառուցվածքը և նյութերը:

 

 

Համաձայնություն No2

Տուփի տպագրական ֆայլի համաձայնեցում

Այս փուլում դիզայները պատրաստում է տպագրության համար վերջնական ֆայլը (artwork), որը դրվում է արդեն համաձայնեցված կառուցվածքի վրա: Տպագրության համար ֆայլը պարտադիր պետք է ստեղծվի կառուցվածի հաստատումից հետո, այլապես տուփի անգամ ամենաչնչին փոփոխության դեպքում (նույնիսկ 1 միլիմետր) կարիք կլինի վերստեղծել ամբողջ ֆայլը, որը բազմաթիվ շերտեր ունի: Վերջնական ֆայլը տպագրվում է սովորական թվային տպիչով (կարող է անգամ սև ու սպիտակ լինել) և փակցվում է կառուցվածքին:

 

Այս փուլի նպատակը հնարավոր անհամապատասխանությունների բացահայտումն է, որոնք հաշվի չէին առնվել դիզայնը մշակելիս: Օրինակ, կարող է պարզվել, որ մասերը հավաքելուց հետո նախշը մեկ ընդհանուր չի կազմում կամ տարբերանշանը տուփը հավաքելուց հետո ներսից գլխիվայր է տեղադրվում: Լրամշակումներից հետո (եթե այդպիսիք լինեն) կարելի է հաստատել տուփի տպագրական ֆայլը և անցնել հաջորդ փուլին:

 

 

Համաձայնություն No3

Տպագրական նմուշի համաձայնեցում

Այս փուլում իրականացվում է հաստատված ֆայլի արտադրական օֆսեթային տպագրություն: Արդյունքում թղթի կամ ստվարաթղթի թերթի վրա հնարավոր է դառնում վիզուալ գնահատել ապագա տուփի գույները և լաքապատումը: Միշտ չի հաջողվում ստանալ հենց այն գույնը, որն անհրաժեշտ է հաճախորդին: Հաստատման գործընթացը բազմաթիվ շտկումների և լրացումների պատճառով կարող է ձգվել մի ամբողջ օր:

 

 

Համաձայնություն No4

Արդյունաբերական նմուշի համաձայնեցում

Սա ավարտական փուլն է, որի ժամանակ տուփը ստացվում է ըստ էության ավարտուն ձևով: Իրականացվում են հատում, դրոշմատպում և կոնգրև, սոսնձում, դետալների և աքսեսուարների ամրացում, եթե այդպիսիք կան: Այս փուլում ևս կարող են անհամապատասխանություններ լինել. օրինակ, կարող է տգեղ ձևով արտահայտվել ստվարաթղթի տեկստուրան, որի վրա սոսնձված է կազմը:

 

Հաստատված արդյունաբերական նմուշը սովորաբար պայմանագրի անբաժանելի մասն է կազմում: Այն ուրույն նմուշ է, որի հիման վրա զանգվածային արտադրության դեպքում լուծվում են բոլոր վեճերը և տարաձայնությունները:

 

Անկասկած, ապրանքի համաձայնեցման յուրաքանչյուր փուլ ժամանակի և միջոցների ծախս է պահանջում: Օրինակ, օֆսեթ տպագրության դեպքում մեկ արդյունաբերական նմուշ ստանալու համար արտադրողն ամեն դեպքում պետք է կարգավորման համար ծախսի առնվազն 100 տպագրական թերթ և հաստոցը զբաղեցնի գործնականում մի ամբողջ օր: Այնուհանդերձ, վերջնական պատվեր ստանալու դեպքում, արտադրողների մեծ մասն իր վրա է վերցնում բոլոր ծախսերը, իսկ Դուք ստանում եք հենց այն, ինչ ցանկանում եք, այլ ոչ թե այն, ինչ ստացվել է: